SÜRGÜNDEN KAYITHAN KARTNI HAPARI
Coldabız. Barabız alga,
Mangılayladan tuzlu ter aga.
Biz cabhan eşik cannet eşigi tüldü.
Curtha kaytırga izlemegen erkişi tüldü.
Col azıgı bolluk esek da,
Adam cazıgı bolluk esek da,
Barlıkbız alga, arı. Anda –
Kerti şıyıhla — Kavkaz taularıbız,
Sabiyligibizça taza suularıbız.
Barabız alga karaganlay cut.
Anda canıbız, atıbız. Curt.
Caşarga buürulmasa, ölürge buyurulur.
Üsübüzge curtnu topragı kuyulur.
Nasıblını tünü da, tüşü da,
Nasıb ülüşü, toprak ülüşü da
Halkdaça bolur, curtunda bolur.
Ketdik arı, hayda ketdik, tur.
Suu da kaytadı tuugan tauuna,
Kayta ese da bulut betli.
Curtsuzluk cetmesin tab kanlı cauuma,
Sınadık anı itlik cetib.
Endi biz taulanı koyub ketgenden
Taula alga bizni koyub keterle.
Toluudan a tolganla imbaşlada
Suuab, günah cazılgan defterle.
Sıylı toprak — ol kuru musliman toprak tül,
Faygambarnı ayagı cetgen,
Sıylı toprak ol — ata-babala Curtu,
Ala bizge amanat etgen.
Adam curtunda kalırga kerekdi,
Kala ese da uruşda sınngan bıçakça.
Ne da taşlı collada aşalıb
Atnı ayagından tüşgen nasıb nalça.
Curtların tabhan nasıblılanı
Nasıbları miyik bolsun, taulaça.
Endi curtha kayıtalmazlıklaga
Ne eteyik ansı?
